CESEDA lege proiektuari buruzko informazioa

CIMADE-k animaturik, GISTI-ko lagun batekin (Groupe d’Information et de Soutien des Immigrés).

FAMILIEN INMIGRAZIOA

Frantsesen ezkontideentzat
  Lehen bezala, egonaldi luzeko visa beharrezkoa da egonaldi agiriaren lortzeko, hartan azalduak direla bizi pribatuaren zehaztapenak. Aldiz, erdietsia izan da Frantziaren kontsulatuek egonaldi luzeko visa eman dezaten (salbu ezkontza desegina edo iruzurrezkoa izan denean, bai eta liskar publikoen kasuetan). Beti ere, kontsulatuek visaren eskaeraren agiria eman behar dute (modu horretan ukapenaren epe inplizitoa aitzina joango da eta helegitea egiten ahalko da).
  Ezin da egoiliar agiria kendu ezkontideak ez direnean gehiago elkarrekin bizi tratu txarren ondorioz, ez eta bikoteak haurrak ukan baditu (sortu zirenetik haien hazteko eta hezteko arduratu dela frogatzen badu guraso atzerritarrak).

Frantsesen haur adin nagusikoentzat

Egoiliar agiriaren eskuratzeko, egonaldi luzeko visaren beharra atxikia da, baina kontsulatuak ezin du ukatu visaren eskaeraren segurtagiria (frantsesen ezkontideentzat bezalaxe). Alderantziz, segurtagiriaren eman beharra ez zaie egokitzen frantsesek beren gain dauzkaten aurrekoei.

Frantses haurren gurasoentzat

Aldi bateko egonaldi agiriaren erdietsi ahal izateko, haurraren hazteko eta hezteko laguntzaren gutieneko iraupena urte batetik bi urtetara pasatzen da.

Lokarri pertsonalak eta familiarrak

Aldi bateko egonaldi agiriaren erdiesteko irizpideak ez dira aldatuak: antzinakotasuna, lokarri pertsonal eta familiar egonkorrak, bizi baldintzak, integrazioa eta sorterrian gelditu den familiarekiko harremanen ezaugarriak.

  Poligamia

• Frantziara emazte bat baino gehiago sarrarazten dituzten atzerritarrei ez zaie babesik emango atzerritar bat legez kanpoko egonaldia bideratzeko akusazioari aurre egiteko.
• Familiarentzako diru laguntza ez zaie gehiago emango atzerritar poligamoei, baizik eta haurren epaileak "familiarentzako laguntzen begirale" izendatu duen pertsonari.

  Haurren ezagutza Aitatasunaren iruzurrezko ezagutza, iruzurrezko ezkontza bezala, 5 urtekorainoko presondegiaz eta 15.000 euroko isunaz zigortuak dira.

  Familiaren biltzea

• Familia biltzen ahal izateko eskatzen den gutieneko diru baliabidea SMIC-a da beti, baina familiako kideen arabera molda daiteke. Baliabideei buruzko baldintzen aplikatzeko moduak dekretuz finkatuko dira.
• Etxeak bete behar dituen baldintzak familiaren kopurua eta bizilekuko herrialdea kontuan hartuz erabakiko dira.
• Familiaren biltzea eskatzen duenean atzerritar batek, haren bizilekuko auzapezak erabakitzen du biltze horrek betetzen dituenez errepublikaren oinarrizko printzipioak.
• Familiaren biltzean oinarritua den egonaldi agiria kentzen ahal da, emana izan eta ondoko hiru urtean, elkarrekiko bizitza hausten bada, salbu bikoteak haurrak ukan baditu eta guraso atzerritarrak, haurrak sortu direnetik, haien hazteko eta hezteko laguntza ekarri baldin badu. Halaber, egonaldi agiria ezin da kendu etxeko bortizkeria gertatu izan bada.
• Ezkontidearen hiltzea ez daiteke elkarrekiko bizitzaren hausturatzat har.

BIZI PRIBATUA

Erientzako

Ez da aldakuntzarik

Frantzian hamar urte baino gehiago bizi direnentzat

Frantzian hamar urte bizi ondoko erregularizazioaren kentzea atxikitzen da.

EGOILIAR AGIRIA

Egoiliar agiriaren erdiestea

Egoiliar agiria ez zaio emanen atzerritar bati, hamabost urtez peko adin gabe baten kontra bortizkeria erabiltzeko akusatua bada eta, orobat, mutilazio edo eritasun iraunkor bat eragin badu, hala nola ablazioa.

Egoiliar agiriaren kentzea

Atzerritar bati egoiliar agiria kenduko zaio eta aldi bateko egonaldi agiria emanen, baldin eta indar publikoei jazarri edo iharduki baldin badie.

INTEGRATZEA

Integrazio baldintza

• Lege egitasmoak Integrazio eta Abegirako Kontratuaren (CAI) izenpetzea aurrikusten du egonaldi agiria lehenbizikoz erdiesten duen atzerritarrarentzat. Kontratu hori zabalduko zaie Frantzian sartzen diren 16 eta 18 arteko gazteei.
• CAI-aren izenpetzea proposatuko zaie, halaber, kontratu hori sortu aitzin erregularizatuak izan direnei eta jadanik egonaldi agiria daukaten pertsonei.
• CAI-n sartua den hizkuntza-formazioa diploma batek bermatua izan behar du, nahitaez.
• CAI-n sartzen da Frantziako bizimoduari buruzko informazio aldi bat.
• CAI-ren markoan hartzen den formazioa dohainik da.
• Administrazioak egonaldi agiriaren berritzea ukatzen ahal dio CAI-k proposatzen dituen formazioak bete ez dituzten atzerritarrei. Hori dela eta, dokumentu bat jasoko dute formazioa modu jarraikiaz hartu dutenek.
• Atzerritarra bizi den herriko auzapeza behartua da bere iritzia ematera atzerritarraren integrazioaz, harek egoiliar agiria eskatzen duenean. Auzapezak ez badu ihardespenik ematen bi hilabeteko epean, aldeko iritzia duela pentsatuko da.
• Hirurogeita bost urtez goitiko pertsonei ez zaie frantses hizkuntza jakitea eskatuko egoiliar agiria eskuratzen ahal izateko.

IKASKETAK, LANA, PRAKTIKA-IKASTALDIAK

Bolondresak

Behin-behineko egonaldi baimena esleituko zaie Frantzian bolondres gisa ihardun nahi dutenei, misio baten markoan edo onura publikoa aitortu zaion elkarte batean.

Ikasleak

• Ikasleek eskatzen duten laneko baimena, beste formalitaterik gabe esleituko zaie. Aldiz, egonaldiko agiria kenduko zaio urte bateko denbora erdia baino gehiago lan egin duen ikasleari.
• Europako Batasunera berriki sartuak diren erresumetako herritarrek, Frantzian master bat lortua badute, ez dute egonaldi agiria behar beren profesioan lan egiteko.

Lana

• Europako Batasunera berriki sartuak diren erresumetako herritarrek egonaldi agiria erdiesten ahal dute lan profesional batean aritzeko, eta ezin da horren kontra argudiatu enpleguaren egoera, kontratatze orduan zailtasunak dituen ofizio baterako.
• Soldatapeko egonaldi agiriaren jasotzea ahalbidetzen duen lan kontratuaren iraupena ez da baitezpada mugagabea, baina bai urte bateko baino luzeagoa.
• Lan kontratuaren hausteak ez lezake ekar "soldatapeko" edo "behin-behineko langile" egonaldi agiriaren kentzea.
• Behin-behineko langileen egonaldi agirian adieraziko da atzerritarra zenbat denborako da haizu Frantzian egotera (urte bateko sei hilabete gehienez), kontrolatua ahal izateko.
• Nagusiak izendatu duen atzerritarrak "misioan den soldatapeko" agiria jasoko du, hiru urtez bali eta berritzen ahal dena. Hartako aplikatzen den lan-zuzenbidea frantses zuzenbidea da.
• Legez kanpoko lana baliatzen duten nagusientzako zigorrak gogortuak izango dira.
• Legez kanpoko lanaren kontrako borroka errazte aldera, onartuko da Prefekturako agenteek eta DDTEFP-koek beren informazioa eta fitxeroak elkar truka ditzaten.

Gaitasunak eta talentuak

• Administrazioa, gaitasun eta talentu agiria ematen "ahal" du, baina ez da horren egitera behartua.
• Agiria arlo humanitariora ere zabalduko da.
• Agiria ez da esleitua izango atzerritarraren nortasun eta gaitasunen arabera, baizik eta haren egitasmoaren edukinaren arabera.
• Atzerritik eska daiteke agiria, Frantziaren kontsulatuen bitartez.

EUROPAR BATASUNEKO HERRITARRAK

Batasuneko herritarrek ez dute inskripziorik egin behar prefekturan, baizik eta bizi diren herriko etxean.

HURRUNTZEA

• Egonaldi ukapenak Frantziatik ateratzeko obligazioa lotua duenean, haren kontra helegiteko epea 15 egunetik hilabetera luzatua da.
• Postaz igortzen den APRFa deuseztatua da.
• Babes politikoa ukatua izan zaion atzerritarrak ezin du bere etorriko erresumara berriz igorria izateko erabakiaren aurka altxatu, salbu elementu berriak ekartzen baditu.
• Erabateko babesa daukaten atzerritarrek, Frantzian egoiliar izan badira (hau da, 2003ko apirilaren 10aren aurreko 10 urtean Frantzian bizi izan badira 3 urtez segituan), eskatzen ahal dute beren espultsioko erabakia deuseztatua izan dadin; hori egiteko epea legea ageri eta 6 hilabetera luzatuko da, baldin eta ezetsia izan zaien aurreko eskaera 2004ko abenduaren 31 aurretik egina izan bazen.

FRANTSES NAZIONALITATEAREN ESKURATZEA

• Zeremonia bat pentsatua izan da frantses batekin ezkonduz frantses nazionalitatea hartu duten atzerritarrei ongi-etorri egiteko; gauza bertsua egingo da Frantzian sortuz geroz frantses diren haurrentzat.
• Frantses batekin ezkondua izan arren, frantses nazionalitatea ukatuko zaie poligamoei, baita 15 urtez peko neska bati ablazioa eginarazi dion pertsonari ere.
• Hamar urtean edo luzazago Frantzian bizi diren atzerritarren nazionalizazio eskaeren bideratzeko epeak laburtuak dira (epea 12 hilabetera pasatzen da, eta hiru hilabeterako berri daiteke aldi batez).

Babesa eskatzen dutenentzako harrera-etxea

ANAEM-ek datu bilketa eta haien sailkapen automatikoa bideratu behar ditu. Adibidez, aterpe-etxeek zenbat leku dituzten babesa eskatzen dutenei eskaintzeko, leku horiek nola erabiliak diren eta zein diren haietan ostatatuak diren atzerritarrak.

BATZORDEAK

Erregularizazioko nazio batzordearen sortzea

Erregularizazioko nazio batzordea izendatuko da, aginte publikoaren eta jendarte zibilaren ordezkariek osatua. Haren betebeharra izango da prefekturen praktiken harmonizatzea eta egonaldiaren ez-ohiko baimenaren emateko irizpideak finkatzea, haietan sar daitezkeelarik premia humanitarioak edo atzerritarrak aurkezten dituen arrazoi bereziak. Barne ministroak batzordea dei dezake bere iritzia eman dezan, prefekturak egonaldiaren ez-ohiko baimena ukatuz gero, haren aurkako helegiteei buruz; baita ere Frantzian azken 10 urtean edo luzazago bizi direla frogatzen ahal duten atzerritarren eskaerei buruz.

Immigrazio eta integrazioko nazio kontseiluaren sortzea

Inmigrazio eta integrazioko nazio kontseiluaren betebeharra da datu estatistikoen bilketan parte hartzea, bere iritzia ematea inmigrazio eta integrazio politikaren norabideei buruz, eta horietaz txosten bat aurkeztea urte guztiz parlamentuari.